التكسي والميكروباص في ســــوريا
في البداية وبعد وقوفك من ربع لنص ساعة وأنت تنتظر يكون الأمر طبيعيا ً ثم
ما يلبث
أن يبدأ التذمر لأن الطحش شغال عالمكرو وإذا ما دفشت ورفست أم أحمد وأم تيسير وطلعت قبلن ما لح تطلع بحياتك وإذا كان معك غراض وما رضي شفير المكرو ياخد منك عن راكبين فأنت مخيّر :
إما أن تضع أغراضك على الأرض ويعّد فوقن أبو علوان وحمودة
أو يدعسوا فوقن حتى مشان يطلعوا
أو أن تضعهن بين رجليك وتاكل زورة كل ما طلع واحد ونزل من عدا تسميع الكلام
أو تحطن على حضنك وتوسخ أواعيك وتكسر رجليك
أما إذا قررت تطلع انت وزجتك بالمكرو فيا سلام يا سلام
لما يبلش الشوفير يطلع بالمراية ويمحّص وتتأكد أنو عم يطلع على مرتك
ويا سلام لما يطلّع الشوفير واحد ويقعد الأخ عالطراحة عكس الشوفير لما مايكون في كرسي ويدقو ركبه بركب مرتك ولما يطلعوا تنين أرذال يعدو خلفك ويبلشوا بالشتائم من تحت الظنار ونازل وانت عم تسمع
مع مرتك ... يا عيـــــن
أما إذا قررت تختصر المشاكل وتركب بالتكسي فالله الله الله لح توقف أول نص ساعة وشفيرية التكسي عم اشرولك بايدون أنو مالي فاضي بــــس إذا أشرتلو بنت ظريفة أو لابسة قصير بعد عشر متار فهو أكيد فاضي وهاد
النوع الأول
أما النوع الثاني فيحب النزهات وخصوصا الرواق فإذا قلت بدك تروح على الميدان أوعلى الحريقة أو القصر العدلي فأكيد ما رح يركبك لأنو عجقة هنيك كتير وما بطلع بيوم ونص لذلك قرر أهالي هذه المناطق بناء مجمع بمطار دمشق الدولي لأن كل التكاسي تنتظر هذا الطلب
النوع الثالث ما بشغل العداد ويا بشارطك على الأجرة - دبل مشوارك – يا أما خليك واقف لبكرة أو بيقلك طلاع وما منختلف و أكيد لما توصل لح تختلف
النوع الرابع راح وزار أحد الملاهي الليلية المتدنية وقرر أن يفتح فرع بالسيارة لهذا الملهى فعند صعودك تلاحظ عناقيد العنب والثريات المتدلية من السقف كما تسمع صوت شريط الغناء النوري العالي جدا مع رائحة الحمرا طويلة وشظاياها وان اعترضت فإما نزيل وإما مشكلة وتذمر
النوع الخامس : النسونجي حيث أنك إن صعدت مع زوجتك يبدأ بتعيير المرايا ثم يبدأ بتزبيط المسجلة والسيجارة والنظر في المرآة وإظهار بطولاته بالكلام أو بالقيادة وإذا كانت الزوجة دايرة وجها يأخذ قنينة الماء ويعرض عليك الشرب ثم يلتفت إلى الوراء تشربي اختي
أما اذا كنت لحالك فبصير الشفير أبو الكرم والنخوة واليتامى والدراويش والولايه حرام مقطوعة خلينا نطلعها بس بعمرو ما بيقول حرام خلينا نطلعوا وبيبلش على قض سير مع الخانم
المزيد من الملخصات حول التكسي والميكروباص في ســــوريا